नवी दिल्ली : तुमचे उच्चार अस्पष्ट आहेत? तुम्हाला काही शब्द बोलताना अडखळायला होतं? तुम्ही बोललेलं समोरच्याला कळत नाही, तुम्हाला अशा काही अडचणींना सामोरे जावं लागत असेल, तर काही निराश होऊ नका. दुनियाभरची माहिती देणारं सर्च इंजिन ‘गुगल’ तुम्हाला आता बोलायलाही शिकवणार आहे. त्यासाठी गुगलने नवं फिचर आणलं आहे.
गुगलने गुगल सर्चसाठी नवं फिचर आणलं आहे. या फिचरसाठी गुगलने मशीन लर्निगचा वापर केला आहे. या फिचरद्वारे तुम्हाला उच्चार कसा करायचा हे शिकवलं जाणार आहे. या आधी गुगलमध्ये एखाद्या शब्द ऐकायला मिळायचा. पण, त्याचा उच्चार कसा करायचा हे सांगितलं जात नसायचं. आता गुगलचे ‘स्पीच रिकॉग्निशन टूल’ तुमच्या बोलल्या गेलेल्या शब्दांना प्रोसेस करेल. तुमचे उच्चार एक्स्पर्ट्सच्या उच्चारांशी मॅच केले जातील आणि तुम्हाला योग्य उच्चार कसा करायचा, हे शिकवलं जाईल. आर्टिफिशियल इंटेलिजन्सद्वारे कोणत्या शब्दाचा उच्चार कसा करायचा, याची या फिचरद्वारे पडताळणी केली जाते. त्यामुळे योग्य उच्चार कसा करायचा हे शिकवलं जातं.
योग्य उच्चार कसा करायचा, हे जाणून घेण्यासाठी गुगलने ‘स्पीक नाऊ’ हे फिचर उपलब्ध करून दिलं आहे. तुम्हाला एखादा शब्द उच्चारता येत नसेल, एखादा शब्द उच्चारताना तुम्ही अडखळत असाल, तर गुगलवर तुम्हाला स्पीक नाऊचा पर्याय दिसेल. तिथे माइक आयकॉनवर टॅप करा आणि तुम्हाला कठीण वाटणारा शब्द उच्चारा. त्यानंतर तुम्हाला तुम्ही त्या शब्दाचा योग्य उच्चार केला की नाही, हे सांगितलं जाईल. तसेच तुम्ही कुठे चुकलात? काय बोलायला हवं होतं, कोणत्या शब्दावर जोर द्यायला हवा, कोणता शब्द अस्पष्ट बोललात, याची सूचनाही तुम्हाला तिथेच मिळेल.
सध्या तरी इंग्रजी शब्दांसाठी हे फिचर उपलब्ध असेल. लवकरच इतर भाषांचा पर्यायही या फिचरमध्ये उपलब्ध करून दिला जाणार असल्याचं गुगलने म्हटलं आहे.