वॉशिंग्टन : जागतिक महासत्ता असलेली अमेरिका करोनाच्या संसर्गासमोर हतबल झाल्याची परिस्थिती आहे. अमेरिकेत करोनाबाधितांच्या संख्या वाढत असताना दुसरीकडे करोनामुळे होणाऱ्या मृत्यूंची संख्या वाढत आहे. अमेरिकेत मृतांच्या संख्येत वेगाने वाढ होत असून मंगळवारी एकाच दिवसात चार हजारजणांच्या मृत्यूंची नोंद करण्यात आली.
अमेरिेकेत करोना लसीकरण मोहीम सुरू असतानाही करोनाबाधितांची संख्या वाढत आहे. जॉन हॉपकिन्स विद्यापीठाने दिलेल्या माहितीनुसार, मंगळवारी संध्याकाळपर्यंत अमेरिकेत दोन लाख २२ हजार नवे करोनाबाधितांची नोंद करण्यात आली. तर, ४१९७ जणांचा करोनाच्या संसर्गामुळे मृत्यू झाला. एकाच दिवशी सर्वाधिक मृतांची नोंद मंगळवारी करण्यात आली. याआधी ७ जानेवारी रोजीच एकाच दिवशी ४१९४ जणांच्या मृत्यूची नोंद करण्यात आली होती. मागील आठवड्यात सरासरी ३२०० हून अधिकजणांचा करोनामुळे मृत्यू झाला होता.
करोनाच्या वाढत्या संसर्गाला अटकाव करण्यासाठी अमेरिकेत लसीकरण मोहीम सुरू करण्यात आली आहे. आतापर्यंत ९ दशलक्षजणांना करोना लशीचा पहिला डोस देण्यात आला असून २७ दशलक्ष करोना लशीचे डोस वितरीत करण्यात आले असल्याचे ‘सीएनएन’ने म्हटले आहे.
जगभरात करोनाबाधितांची संख्या वाढत असून ९.१९ कोटीहून अधिकजणांना संसर्गाची लागण झाली आहे. तर, सहा कोटी ८० लाखांहून अधिकजणांनी करोनावर मात केली आहे. तर, १९ लाख ६८ हजारजणांना करोनामुळे आपले प्राण गमवावे लागले आहे.
दरम्यान, करोनाच्या संसर्गाचे थैमान सुरू असताना दुसरीकडे त्याला अटकाव करण्यासाठी अनेक देशांनी लसीकरण सुरू केले आहे. करोनाची लस एकदा घेतल्यानंतर किती वर्ष विषाणूंपासून सुरक्षा मिळेल असा प्रश्न निर्माण झाला आहे. एकदा लस घेतल्यानंतर काही वर्ष सुरक्षित राहता येईल, असा दावा मॉडर्नाचे सीईओ स्टीफन बँसेल केला आहे.
करोना लस किती वर्ष सुरक्षिता देईल याबाबतचे योग्य आकलन करण्यासाठी लशीबाबत अनेक माहिती जमा करणे आवश्यक असल्याचे बँसेल यांनी सांगितले. करोना लस फक्त एक-दोन महिने सुरक्षित ठेवू शकते, असा दावा काही माध्यमांनी केला आहे. मात्र, हा दावा निरर्थक असल्याचे त्यांनी सांगितले. लशीमुळे मानवी शरीरात निर्माण होणारे अॅण्टीबॉडी हळूहळू कमी होतात. त्यामुळेच लशीमुळे काही वर्ष तरी करोनापासून सुरक्षा मिळू शकते, असे त्यांनी सांगितले.
(PRAHAAR)