मुंबई : पाकिस्तानी गुप्तचर यंत्रणांना भारताची संवेदनशील माहिती पुरवल्याच्या आरोपांखाली हनी ट्रॅप (Honey Trap) प्रकरणातील अटकेत असलेले डीआरडीओचे (DRDO) शास्त्रज्ञ डॉ. प्रदीप कुरुलकर (Pradeep Kurulkar) यांनी ब्रह्मोस-अग्नी आणि युसीव्ही सारख्या क्षेपणास्त्रांची माहिती पाकिस्तानला पुरवली असल्याचे चौकशीत समोर आले आहे.

भारतीय संरक्षण संशोधन आणि विकास संस्थेच्या (Defence Research and Development Organisation – DRDO) शास्त्रज्ञाला हनी ट्रॅपमध्ये फसवून त्यांच्याकडून भारतीय संरक्षण क्षेत्रातील संवेदनशील माहिती मिळवण्याचा प्रयत्न होता. अटकेत असलेले डीआरडीओचे वैज्ञानिक डॉ. प्रदीप कुरुलकर यांच्या आरोपपत्रात ही महत्त्वाची माहिती उघड झाली आहे.

एटीएसने (ATS) विशेष न्यायालयात कुरुलकर यांच्या विरोधात दाखल केलेल्या आरोपपत्रात अनेक बाबी समोर आल्या आहेत. यामध्ये सांगितल्याप्रमाणे, डॉ. प्रदीप कुरुलकर यांनी पाकिस्तानी महिला गुप्तचराला भारतीय क्षेपणास्त्र, ड्रोन आणि रोबोटिक्स संदर्भातील माहिती पुरवल्याचे समोर आले आहे. एटीएसने ३० जून रोजी डॉ. कुरुलकर यांच्या विरोधात आरोपपत्र दाखल केले असून त्यामध्ये ही माहिती उघड झाली आहे.

एटीएसने दाखल केलेल्या आरोपपत्रानुसार, पाकिस्तानी एजंटने डॉ. प्रदीप कुरुलकर यांच्यासोबत सोशल मीडियावर संवाद साधण्यासाठी वेगवेगळ्या नावांनी बनावट खाती तयार केली. यापैकी दोन खाती झारा दासगुप्ता आणि जुही अरोरा या नावाने होती. प्रदीप यांच्यासोबत झारा दासगुप्ता नावाच्या आयडीवरून चॅट करणाऱ्या पाकिस्तानच्या एजंटने ती ब्रिटनमध्ये सॉफ्टवेअर इंजिनियर असल्याचे सांगितले होते. झाराने प्रदीप यांच्यासोबत मैत्री केली. यानंतर या पाकिस्तानी एजंटने कुरुलकर यांच्याकडून ब्रह्मोस क्षेपणास्त्र, अग्नी क्षेपणास्त्र आणि मिलिटरी बिडिंग सिस्टम, ड्रोन, यूसीव्ही आणि इतर गोष्टींची माहिती मागितली. त्यानंतर प्रदीप यांनी ही सर्व माहिती गोळा करून त्या पाकिस्तानी एजंटला पाठवली.

प्रदीप कुरुलकर झारासमोर आपल्या कामाची फुशारकी मारत असे, असेही आरोपपत्रात म्हटले आहे. एटीएसने दाखल केलेल्या १ हजार ८३७ पानांच्या आरोपपत्रात खूप गंभीर बाबी उघड झाल्या आहेत. यातील एका चॅटमध्ये, पाकिस्तानी एजंटांनी अग्नी-६ लाँचर चाचणी यशस्वी झाली का, असे विचारले. ज्यावर कुरुलकर यांनी उत्तर दिले होते की, “लाँचर हे माझे डिझाइन आहे. हे एक मोठे यश आहे. कुरुलकर आणि पाकिस्तानी एजंट्समधील हा चॅट सप्टेंबर २०२२ ते फेब्रुवारी २०२३ दरम्यानचा आहे.

Get latest Marathi News, Maharashtra News and Latest Mumbai News from Politics, Sports, Entertainment, Business and local news from Mumbai and All cities of Maharashtra